Xinzo de Limia

Xinzo de Limia cede a xestión do Museo Galego do Entroido á Deputación de Ourense co voto favorable de PP e PSdeG

No pleno ordinario celebrado onte luns, día 5 de novembro, tamén se aprobaron aumentos nas taxas de auga e saneamento

IMG_6018

Na mañá de onte, luns día 5 de novembro, a corporación municipal de Xinzo de Limia celebrou o seu pleno ordinario do mes. O punto máis candente da xornada foi o debate en torno á cesión da xestión do Museo Galego do Entroido á Deputación de Ourense, que finalmente foi aprobada. Os voceiros de Xinzo Adiante, BNG e PSdeG criticaron ao goberno local por non ser quen de manter aberto o museo baixo titularidade municipal. Malia iso, o grupo socialista apoiou a iniciativa priorizando que a mostra volte a estar aberta ao público.

O concelleiro popular, Carlos Gómez, defendeu o esforzo adicado nos últimos anos a conseguir que o museo fose posto en marcha, criticando a inacción neste senso durante os anos do bipartito na Xunta de Galicia.

IMG_6020Na sesión plenaria tamén foi aprobada a actualización en base ao IPC das taxas correspondentes ao servizo de abastecemento de augas e tratamento da depuración. A oposición, que votou en contra, criticou o prezo da auga na capital limiá e o estado de moitas das estacións depuradoras. O goberno local, pola súa banda, defendeu que o contrato coa empresa que actualmente xestiona este servizo é legal e que teñen capacidade de manobra para mellorar a situación. Xinzo Adiante pediu que as taxas estean ligadas ao consumo.

O pleno tamén serviu para aprobar, coa abstención dos tres grupos da oposición, unha transferencia de crédito para que o consistorio poida facer fronte ao pago a proveedores. Por último, o grupo popular votou en contra da urxencia dunha moción presentada por Xinzo Adiante, na que se pretendía instar ao SERGAS a que garanta a calidade dos servizos sanitarios e o abastecemento das farmacias.