En Xinzo de Limia, a 15 de setembro de 2025. Coa Biblioteca Antelana modernizada e con novo horario de inverno, e cunha Casa da Cultura renovada e máis accesible, o Concello de Xinzo de Limia reforza o seu compromiso co acceso á lectura, ao estudo e á participación cultural da veciñanza.

A Biblioteca Municipal Antelana, aberta ao público en 1956 e próxima a cumprir setenta anos en 2026, inicia unha nova etapa tras unha reforma integral impulsada pola Concellería de Cultura. Segundo consta no libro de rexistro de obras, o seu primeiro bibliotecario foi Antonio Rodríguez “Rodriguete”. O novo mobiliario, o equipamento renovado e, sobre todo, a creación dunha Aula de Estudo permanente —aberta de luns a venres durante dez horas ao día— favoreceron un notable incremento de uso. Un exemplo é o inusual volume de 465 préstamos rexistrados entre xullo e agosto.

Novo horario de inverno (préstamos e devolucións)

• Mañás: luns e venres, de 10:30 a 13:00 h

• Tardes: de luns a venres, de 15:30 a 20:45 h

A Aula de Estudo permanecerá aberta de luns a venres, de 09:00 a 14:00 h e de 15:30 a 20:45 h.

Casa da Cultura: detalle das actuacións executadas en 2025

En paralelo á modernización da biblioteca, a Casa da Cultura viviu este ano un programa de melloras cun investimento superior aos 110.000 €, grazas á colaboración coa Consellería de Cultura da Xunta de Galicia e ás achegas do Concello de Xinzo de Limia. As principais intervencións foron:

• Reforma e entarimado das oficinas de Cultura (1ª planta), mellorando confort e funcionalidade.

• Rehabilitación integral das aulas 1, 5, 6, 10, 12, 14 e 15, con renovación de acabados e acondicionamento para docencia e ensaio.

• Instalación dun ascensor para mellorar a accesibilidade e garantir comunicación vertical accesible entre plantas.

• Pintado e acondicionamento dos aseos da 1ª e 2ª planta, reforzando conservación e hixiene.

• Pintado do hall e da sala de exposicións da planta baixa, e das zonas comúns da 1ª planta, actualizando a imaxe xeral de acollida.

• Mellora das instalacións de son e iluminación do salón de actos e pintura integral do recinto, elevando a calidade técnica para concertos, teatro e actos institucionais.

Trabállase agora nun plan a medio prazo para completar o reacondicionamento das aulas restantes e da planta baixa (hall e soportais), co obxectivo de crear novos espazos polivalentes adaptados ás necesidades socioculturais actuais.

Memoria e cultura viva

Como complemento ao novo horario, a Casa da Cultura acolle nestas datas unha exposición de carteis que repasa as 40 edicións das Xornadas de Folclore, unha mostra que cobra especial valor nun ano no que o evento non puido celebrarse en Xinzo a causa dos incendios acontecidos na provincia de Ourense no mes de agosto.