Xinzo de Limia, a 08 de xaneiro de 2024.  O Entroido de Xinzo de Limia xa demostrou o seu poder de convocatoria durante décadas e agárdase gran afluencia nesta edición. Para que as festas se desenvolvan sen incidencias, o Concello de Xinzo de Limia conta cun Plan de Autoprotección que ten como obxectivo previr as causas das posibles emerxencias, detectándoas e evitándoas. Tamén garante a fiabilidade dos medios de protección, de forma activa e permanente e programa os plans de actuacións ante calquera incidente. Con este obxectivo, o luns pola mañá celebrouse na Casa Consistorial unha reunión para coordinar os dispositivos de seguridade deseñados de cara as xornadas festivas.

Cómpre destacar que nas proximidades da Praza Maior se instalará un vehículo da Axencia de Emerxencias de Galicia (AXEGA), no que haberá un Posto de Mando Avanzado os días de maior afluencia de persoas. 

Durante os días grandes do Entroido contarase, ademais, cos seguintes equipos de intervención: Parque de Bombeiros de Xinzo de Limia, Policía Local, Garda Civil, Garda Civil de Tráfico e Protección Civil. Tamén cómpre destacar que estará operativo un posto médico de auxilios, así como efectivos de Cruz Vermella e do CIM para dar resposta coordinada ante calquera incidente coa maior celeridade. 

Cómpre subliñar tamén que se instalará videovixilancia en distintos puntos estratéxicos da vila e puntos violetas que velarán pola seguridade das mulleres ante as agresións machistas.

O alcalde, Amador Díaz volve a facer un chamamento ao civismo para que veciñas, veciños e visitantes poidan disfrutar un ano máis do Entroido sen ter que lamentar incidencias.