Xinzo de Limia, a 27 de setembro de 2023. O Programa Hypatia desenvolveuse durante este mes de setembro por segundo ano consecutivo nos Concellos de Xinzo de Limia, Sandiás e Vilar de Barrio de xeito conxunto. O programa contou con 77 participantes que acudiron ós obradoiros que tiveron lugar en diferentes centros sociais dos tres concellos.

Na xornada do martes, a Conselleira de Emprego e Igualdade acudiu a Xinzo de Limia para coñecer de primeira man o funcionamento do proxecto así como mostrar o seu apoio a este tipo de iniciativas. Como moderadora actuou Laura Seara, responsable do Programa Hypatia. 

O alcalde de Xinzo, Amador Díaz, tivo oportunidade para valorar este tipo de proxectos logo de agradecerlle a presenza a tódolos asistentes, incluídos alcaldes e concelleiros de toda a comarca.  Aproveitou tamén para “pedirlle ós alcaldes e concelleiros presentes, que os servicios sociais sexan unha loita común entre tódalas administracións alén das ideoloxías”.  Tamén puxo en valor as tarefas da concellería de servicios sociais e igualdade do Concello de Xinzo de Limia, a cal “recibe diariamente peticións por parte de veciñas e veciños do noso Concello”.